कमलापूर एलिफंट कॅम्पमध्ये हत्ती प्रशिक्षण कार्यक्रम यशस्वी; लॉयड्स मेटल्स अँड एनर्जी लिमिटेडचे सहकार्य
गडचिरोली, प्रतिनिधी — कमलापूर एलिफंट कॅम्प येथे १७ ते २३ फेब्रुवारी २०२६ दरम्यान आयोजित हत्ती प्रशिक्षण कार्यक्रम यशस्वीरीत्या पार पडला. हत्ती आणि महावत यांच्यातील समन्वय वाढवणे, सुरक्षितता मजबूत करणे तसेच कार्यक्षमता सुधारण्याच्या उद्देशाने हा उपक्रम राबविण्यात आला. हा कार्यक्रम लॉयड्स मेटल्स अँड एनर्जी लिमिटेडच्या कॉर्पोरेट एन्व्हायर्नमेंटल रिस्पॉन्सिबिलिटी (CER) अंतर्गत आयोजित करण्यात आला असून कंपनीने यासाठी आर्थिक मदत दिली.
या प्रशिक्षणासाठी तज्ज्ञ महावत आणि पशुवैद्यकीय तज्ज्ञ डॉ. राजेश यांनी मार्गदर्शन केले. ते तामिळनाडूतील प्रसिद्ध हत्ती प्रशिक्षण केंद्रातून विशेषतः आले होते. प्रशिक्षणात आदेश पद्धती, वर्तन प्रतिसाद, कंडीशनिंग तंत्र, मानवी पद्धतीने हाताळणी, शिस्त, वर्तन व्यवस्थापन तसेच आरोग्य तपासणी यांवर विशेष भर देण्यात आला.
कार्यक्रम महाराष्ट्राचे प्रधान मुख्य वनसंरक्षक व मुख्य वन्यजीव संरक्षक एम. एस. रेड्डी यांच्या मार्गदर्शनाखाली आणि माजी पीसीसीएफ (वन्यजीव) व कंपनीचे सल्लागार महिप गुप्ता यांच्या सहकार्याने सुरू करण्यात आला. सिरोंचा वन विभागाचे उपवनसंरक्षक नवकिशोर रेड्डी, कंपनीचे महाव्यवस्थापक अमिताव मलिक आणि उपव्यवस्थापक (वन्यजीव) कुम्मारी स्वामी यांनी कार्यक्रमात महत्त्वाची भूमिका बजावली.
कमलापूरचे रेंज फॉरेस्ट ऑफिसर गौरेश गौतम गडमाडे, प्रोबेशनरी रेंज फॉरेस्ट ऑफिसर अनिरुद्ध माने आणि डॉ. नागेश्वर रामलाल चौहान यांच्या हस्ते उद्घाटन झाले. वन विभाग अधिकारी आणि कंपनी प्रतिनिधी निक्षेपन गौड यांनी कार्यक्रमाचे समन्वयन केले.
कॅम्पच्या विकासासाठी कंपनीने वन विभागाला ३४.५३ लाख रुपयांची मदत दिली असून पायाभूत सुविधा सुधारण्यासाठी आणखी ४० लाख रुपये खर्च करण्यात येणार आहेत. त्यामुळे या ठिकाणी इको-पर्यटनालाही चालना मिळणार असल्याची माहिती देण्यात आली.
समारोप कार्यक्रम कमलापूर रेंज कार्यालयात झाला. यावेळी सहाय्यक वनसंरक्षक विष्णु वर्धन रेड्डी, रेंज फॉरेस्ट ऑफिसर गौतम गडमाडे, अनिरुद्ध माने तसेच वन विभाग आणि कॅम्पचे कर्मचारी उपस्थित होते. संयुक्त प्रयत्नांमुळे हत्ती व्यवस्थापन अधिक सक्षम होऊन कॅम्पची कार्यक्षमता व आकर्षण वाढेल, असा विश्वास यावेळी व्यक्त करण्यात आला.
