लॉयड्स स्पोर्ट्स अकादमीचा राज्यस्तरीय दुहेरी यश : व्हॉलीबॉल चॅम्पियनशिप जिंकली, मोनिका मडावीला उंच उडीत रौप्यपदक
Lloyds Sports Academy’s state-level double success: Won volleyball championship, Monica Madavi won silver medal in high jump
वर्षा भाजीपाले कार्यकारी संपादक गडचिरोली
गडचिरोली : लॉयड्स इनफिनिट फाउंडेशनचा घटक असलेल्या लॉयड्स स्पोर्ट्स अकादमी (एलएसए) च्या खेळाडूंनी राज्यस्तरीय क्रीडा स्पर्धांमध्ये उल्लेखनीय कामगिरी करून गडचिरोली जिल्ह्याचे नाव उज्ज्वल केले आहे.
रामनगर (गोंदिया) येथे नुकत्याच पार पडलेल्या राज्यस्तरीय व्हॉलीबॉल स्पर्धेत एलएसएच्या व्हॉलीबॉल संघाने अंतिम सामन्यात 2-0 ने विजय मिळवत चॅम्पियनशिप ट्रॉफी आपल्या नावावर केली. या स्पर्धेत 16 संघांनी सहभाग घेतला होता.
दरम्यान, पुणे येथे 2 ते 5 सप्टेंबरदरम्यान झालेल्या राज्यस्तरीय ऍथलेटिक्स चॅम्पियनशिपमध्ये एलएसएची प्रशिक्षार्थी मोनिका मडावी हिने महिला अंडर-20 उंच उडी स्पर्धेत 1.40 मीटर उडी मारत रौप्यपदक जिंकले. या स्पर्धेत महाराष्ट्रातील 36 जिल्ह्यांतील तब्बल 2100 खेळाडूंनी भाग घेतला होता.
या यशामुळे मोनिका मडावीची 18 ते 20 सप्टेंबरदरम्यान मध्यप्रदेश येथे होणाऱ्या वेस्ट झोन ऍथलेटिक्स चॅम्पियनशिपसाठी निवड झाली आहे. या स्पर्धेत महाराष्ट्र, मध्यप्रदेश, गुजरात, राजस्थान व गोवा या राज्यांतील नामांकित खेळाडू सहभागी होणार आहेत. तिची कामगिरी गडचिरोलीतील खेळाडूंना राष्ट्रीय स्तरावर चमक दाखवण्याच्या दिशेने महत्त्वाचा टप्पा ठरत आहे.
लॉयड्स स्पोर्ट्स अकादमीच्या प्रवक्त्यांनी सांगितले की, “ही कामगिरी गडचिरोलीसारख्या ग्रामीण व आदिवासी बहुल जिल्ह्यातील खेळाडूंना व्यासपीठ उपलब्ध करून देण्याच्या आमच्या बांधिलकीचे प्रतीक आहे. आमचे ध्येय म्हणजे एथलेटिक्सपासून टीम स्पोर्ट्सपर्यंत जागतिक दर्जाचे प्रशिक्षण व संधी उपलब्ध करून देऊन स्थानिक तरुणांना राज्य, राष्ट्रीय आणि आंतरराष्ट्रीय स्तरावर घडवणे.”
एलएसएच्या या दुहेरी यशामुळे गडचिरोली महाराष्ट्रातील एक उदयोन्मुख क्रीडाकेंद्र म्हणून पुढे येत असल्याचे चित्र आहे.
