लॉईड्स ग्रुपकडून १,६९२ कर्मचाऱ्यांना ESOP गडचिरोलीत भागीदारी मजबूत करत औद्योगिक परिवर्तन
प्रतिनिधी शहर प्रतिनिधी
गडचिरोली(सुरजागड) दि १६ डिसेंबर :-
उत्कृष्ट कार्यसंस्कृती आणि सर्वसमावेशक विकासाचे आदर्श उदाहरण मांडत लॉईड्स मेटल्स अँड एनर्जी लिमिटेड (LMEL) ने १,६९२ कर्मचाऱ्यांना कर्मचारी स्टॉक ओनरशिप प्लॅन (ESOP) अंतर्गत शेअर्सचे वाटप केले. हेडरी झोन येथे सोमवारी आयोजित ESOP वितरण समारंभात हा उपक्रम राबविण्यात आला.
आतापर्यंत LMEL कडून एकूण १०,६३१ कर्मचाऱ्यांना ESOPs चा लाभ देण्यात आला असून, या उपक्रमामुळे कर्मचाऱ्यांना आर्थिक सुरक्षिततेसह कंपनीच्या प्रगतीतील भागीदारत्व मिळत आहे.
समारंभाची सुरुवात पारंपरिक दीपप्रज्वलनाने झाली. यावेळी छत्रपती शिवाजी महाराज आणि भगवान बिरसा मुंडा यांना आदरांजली वाहण्यात आली. उपस्थित मान्यवरांचे पुष्पगुच्छ देऊन स्वागत करण्यात आले.
कर्मचाऱ्यांना संबोधित करताना व्यवस्थापकीय संचालक श्री. बी. प्रभाकरन यांनी सांगितले की, ESOPs मुळे कर्मचारी केवळ कामगार न राहता कंपनीचे भागीदार बनले आहेत. कर्मचाऱ्यांच्या समर्पणामुळेच LMEL ची झपाट्याने वाढ होत असून, गडचिरोली जिल्ह्याच्या सर्वांगीण विकासात कंपनीचा मोलाचा वाटा असल्याचे त्यांनी नमूद केले.
गडचिरोलीला औद्योगिक मुख्य प्रवाहात आणण्यामागे मुख्यमंत्री देवेंद्र फडणवीस यांची दूरदृष्टी असल्याचे सांगत, लॉईड्स मेटल्स ते स्वप्न प्रत्यक्षात साकार करत असल्याचे प्रभाकरन यांनी स्पष्ट केले. या प्रयत्नांना त्यांनी राष्ट्रसेवेचे स्वरूप असल्याचेही म्हटले.
दीर्घकालीन दृष्टी मांडताना त्यांनी गडचिरोलीला “नवीन जमशेदपूर” म्हणून विकसित करण्याची आपली महत्त्वाकांक्षा व्यक्त केली. जमशेटजी टाटा यांनी पोलाद उद्योगाची घातलेली पायाभरणी आणि टाटा समूहाचा जागतिक प्रवास याचा संदर्भ देत, भविष्यात LMEL मधील एखादा कर्मचारी संचालकपदापर्यंत पोहोचेल, असा विश्वास त्यांनी व्यक्त केला.
समारोप करताना, या दुर्गम भागात सेवा देणाऱ्या डॉक्टर, अभियंते आणि सुरक्षित व समावेशक कार्य वातावरण निर्माण करणाऱ्या सुरक्षा कर्मचाऱ्यांचे त्यांनी विशेष आभार मानले. पुरुष व महिला कर्मचारी समान समर्पणाने योगदान देत असल्याचा उल्लेखही त्यांनी केला.
